Gjykata Speciale vjen me lajmin e fundit për Hashim Thaçin dhe të tjerët

Gjykata Speciale ka caktuar datën 22 shkurt, si datë për seancën e radhës, ndaj ish-presidentit Hashim Thaçi dhe të tjerëve.

Me anë të një njoftimi për media, Gjykata Speciale ka njoftuar dje se Gjykatësi i Procedurës Paraprake miratoi kërkesën e Mbrojtjes për caktimin e seancës në të cilën do të dëgjohen argumentet e palëve mbi çështjet e ngritura në parashtrimin e ZPS-së lidhur me trajtimin e informacioneve konfidenciale dhe kontaktet me dëshmitarët.

Seanca është caktuar për të martën, më 22 shkurt, në orën 14:30.

Kundër ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit është konfirmuar aktakuza për krime lufte dhe krime kundër njerëzimit.